四眼佬打冷小廚

营业中

休息中

天气开始冻，就会好想食下羊腩煲呢一类风味小菜，而谂起羊腩煲，都会谂起大排档，但系坐大排档实在太冻啦，所以我哋就拣咗呢间四眼佬打冷小厨，坐喺室内一路食羊腩煲，一路食打冷小菜。双冬羊腩煲（细） （ $368 ）呢度嘅羊腩煲大大煲，用咗Gas炉一路煲住一路食，够晒暖身。羊腩够大件够厚身，炆得入味，加上够晒入味嘅枝竹、同埋赠送的大大碟生菜，真系好味又抵食。另外仲嗌左一份打冷必食嘅韭菜猪红。其实我自己就唔食韭菜嘅，但偏偏就好钟意食猪红，所以每次都一定要同朋友一齐先够胆嗌，否则就食净晒啲韭菜。呢度嘅韭菜猪红，猪红嘅份量非常之多，啱晒我，而且猪红够晒滑，汤汁调味亦都非常之浓郁美味，唔错。另外仲叫咗一份椒盐墨鱼咀，墨鱼咀唔系度度都有得食，见到呢度有得嗌，当然叫一份试吓。墨鱼咀够晒大粒，口感弹牙，外层嘅炸浆揸得酥脆，饮啤酒要来送酒就一流。整体来讲，呢度嘅食物质素真系唔错，而且地点非常之方便，邻近地铁站，非常适合约一大班朋友一齐嚟食。