明師傅甜品 (已結業)

 原来，食好味啲嘅嘢真系要排队㗎。事缘我同太太平时帮衬开隔离舖，今次因为唔想排队，所以入咗呢间，我叫咗榴金岁月，即西米露加几旧柑及一旧仔榴梿，我老婆就叫咗佢平时喺隔离舖叫开嘅芒果黑珍珠，即系兰香子加芒果及椰汁，转头好快就到，我太太第一眼见到佢𠮶碗黑珍珠，翻两翻发觉质感好希，已心知不妙，试一口完全不是味儿，成碗唔食推咗俾我，我唯有照单全收，我发觉唔单只希，芒果又切到好细粒，仲要得几粒，同埋好酸，我有垃圾焚化炉之称亦只食咗一半就顶唔住，之后品尝我嘅榴金岁月，哗！成碗嘢除咗𠮶旧仔榴梿分开食算系ok,其余又系一个"希"字，不敢恭维，最后，我唯有超额啃咗两碗"甜品"，跟住过返隔离买返碗外卖黑珍珠俾太太，仲要平呢间四蚊。今晚原本心情好好，就俾一个错误决定破坏整晚气氛。其实几年前明师傅开始进驻荃湾时挟住酒店师傅整嘅甜品喺众安街开舖时帮衬过，𠮶阵觉得唔差，点知几年后喺呢间舖翻兜会变成咁嘅质素，究竟系我咁啱拣正两样明师傅最差嘅甜品，定系退步咗咁多？总之，以后唔会再因为唔想排队而入咗一间令人后悔嘅食肆！