蜜滋麻美

营业中

休息中

黑糖珍珠鲜奶热潮系香港虽然已经退去，但身边都有好多黑糖珍珠店想试，其中一间必数呢间由台中开过嚟嘅人气过江龙店，因为佢唔系普通黑糖珍珠鲜奶咁简单，佢最特别系奶盖上加咗花生、芝麻，口感更多，睇人地打卡啲相真系好吸引！环境位于中环半山区附近，系斜路上，位置较难找，但晚上时分嚟到都不少客人，可见店舖都几受欢迎，店内仲有影相打卡位。餐牌主打两沟嘅花芝、花生、芝麻味，我自己就为咗两沟嘅花芝而来。花芝黑糖珍珠鲜奶 $32(M) 花生同芝麻粒都系台湾直送，每日新鲜磨制，一拎上手已经闻到好香花生芝麻味，且多到满泻！搞匀后饮不得了，估唔到花生芝麻粒同黑糖珍珠鲜奶系咁夹，每啖都有花生芝麻咬下，有少少好似饮得嘅糖不甩咁，好正，钟意花生芝麻嘅你不能错过！抹茶黑糖珍珠鲜奶 $30(M) 除咗花生芝麻，仲有可可及抹茶口味，另一半钟意抹茶就拣咗抹茶，饮落抹茶都几香又唔会觉得苦涩。总括而言，好啱我呢啲花生芝麻爱好者，啖啖饮到真系好过瘾黑糖珍珠鲜奶唔再系斋饮咁简单，加少少心思变得不一样，必会再帮衬。