影片
更多
2011-01-21
660 浏览
有朋自远方来，话想食上海菜，所以就带左佢地去间佢地听都未听过既宁波同乡会，食Ｄ喺外国食唔倒既正宗宁波风味。虽然宁波会系私人会所，不过未系会员既朋友唔洗惊，因为唔需要任何人介绍，只要填张好简短既表格，同埋交$100年费就可以立刻成为会员，即时就有张临时会员卡，效率好高。如果同桌已有会员，𠮶$100可以入埋会员张单到添。环境卫生：酒楼式装修，好简单，绝对冇多余既摆设或花巧既设计，非常符合经济原则。地方打理得干净企理：虽然谈不上洁亮如新，不过一定唔会见到一dat dat既旧污积，穿左隆既枱布同餐巾，或者系崩左既碗筷。小弟帮衬𠮶晚大厅好爆好逼人，枱同枱中间唔系好多位，尤其系大枱附近，可以话系动弹不得；睇得出佢想用尽所有实用面积黎做生意。个人觉得最大𠮶张枱顶哂笼只可以坐十二个人。隔暗设备可以话系零，所以除非好少人帮衬，唔系真系好嘈。个会其实系有间＂会长房＂既：如果摆一席（最多十四人），最低消费为 $6,000；如果摆两席，最低消费为每席 $4,500。接电话𠮶位姐姐仔好细心咁解释话客人可以订𠮶间房，不过因为系＂会长房＂，所以就算订左房，如果当日会长突然有要求，客人系要让返间房出黎比会长既，而工作
虽然宁波会系私人会所，不过未系会员既朋友唔洗惊，因为唔需要任何人介绍，只要填张好简短既表格，同埋交$100年费就可以立刻成为会员，即时就有张临时会员卡，效率好高。如果同桌已有会员，𠮶$100可以入埋会员张单到添。
环境卫生：
酒楼式装修，好简单，绝对冇多余既摆设或花巧既设计，非常符合经济原则。地方打理得干净企理：虽然谈不上洁亮如新，不过一定唔会见到一dat dat既旧污积，穿左隆既枱布同餐巾，或者系崩左既碗筷。
小弟帮衬𠮶晚大厅好爆好逼人，枱同枱中间唔系好多位，尤其系大枱附近，可以话系动弹不得；睇得出佢想用尽所有实用面积黎做生意。个人觉得最大𠮶张枱顶哂笼只可以坐十二个人。隔暗设备可以话系零，所以除非好少人帮衬，唔系真系好嘈。
个会其实系有间＂会长房＂既：如果摆一席（最多十四人），最低消费为 $6,000；如果摆两席，最低消费为每席 $4,500。接电话𠮶位姐姐仔好细心咁解释话客人可以订𠮶间房，不过因为系＂会长房＂，所以就算订左房，如果当日会长突然有要求，客人系要让返间房出黎比会长既，而工作人员就会喺大厅到用屏风间返间房比订左房既客人用。请留意，宁波会有好多会长架，而且屏风间既房都有最低消费。
服务：
全场最落力既系一位哥哥仔：如果冇记错，佢个名应该叫阿Ken；虽然佢冇著西装，不过爸爸话佢一定系经理；佢做野真系效率高，反应快；落单，开酒，攞雪桶，分𩠌，可以一手包办。相比起上黎，其他姐姐仔就好似猪油膏咁，好多时重唔明我地讲乜，要等阿 Ken 处理返（服务分说明：阿Ken攞满分，其他人就负一分）。
味道：
碟上并无多余既汁液或油积，证明佢每道𩠌都有抺过碟先攞出黎，非常之睇得及得体。
清炒虾仁：$160；选取好细只既河虾炒制，鲜甜爽口，好食过出面用中虾或大虾做既多多声；最感动系佢唔油腻，冇落醋都唔会觉得溜；健康推介一。
醉鸽：$95；酒味香醇浓郁；鸽肉唔肥，不过就有少少嚡，唔够嫩。唔知醉鸡个肉质会唔会好Ｄ呢？
鸭舌：$95；好少食倒咁软熟滑溜同咁够热既鸭舌；如果唔系因为味道有少少咸，一定会在推介之列。
砂锅云吞鸡：$300/只；个汤好够火候，好有鸡味；鸡肉唔算嚡，不过可以再煮腍Ｄ；汤入面既绍菜就够哂腍啦，而且好甜；云吞个皮够薄，唯一怪怪地既系个馅全部系猪肉，虽然肥瘦均匀，不过就好似食紧猪肉丸多过食紧云吞啰。
清炒鳝糊：$90；为安全起见，大家落单时一定要讲明＂清炒＂鳝糊，要求古式煮法，即最后一刻先好落生蒜，＂赞＂熟油。依道𩠌简直系顶瓜瓜，带过咁多人黎食，个个都赞不绝口！首先，上枱既时候够哂滚热辣；鳝肉本身鲜甜无比，肉质幼嫩弹牙；炒功亦非常了得，做得好香口，而且唔会好似其他餐厅咁炒到杰 tat tat 或者一pat pat。成碟鳝真系一条骨都揾唔倒架！如果真系要鸡蛋里挑骨头，身为蒜皇既我觉得生蒜份量可以再加码。不过讲真一句，宁波会既鳝糊系我喺香港食过之中最正既。古式推介二。
炸臭豆腐：$60 / 六块；宁波会既招牌菜之一，臭味离远未上枱已经闻倒，上埋枱你𠮶日唔想洗头都唔得。炸得好松化，皮脆心软，不过大家要小心个心热呀。招牌推介三。
红烧元蹄：$180；喺转盘上转左个圏比大家睇完，阿Ken就自动攞把刀黎帮我地切，Ｄ烟同香味重系肉身慢慢升上黎，好high呀。元蹄一Ｄ都唔肥，皮靓肉嫩，精彩到连Ｄ骨都识自动剥落黎，小弟不禁拍手叫绝。精彩推介四。
白肉片：$70；唔需要特别讲明，个汁都会分开上。虽然个卖相好似唔系好得，不过意外地好好食，因为白肉切得够薄，而且咬落一Ｄ都唔嚡。意外推介五。
鸡火干丝：$80；鸡丝火腿丝够幼；唔咸得黎重要甜甜地，几得意。
炸银丝卷：$12/条；热辣辣，新鲜炸出黎，未转完一个圏已经冇哂，要encore既一味。个皮炸得好脆，但系个包入面就好软熟。虽然包本身已经系甜甜地，不过加埋炼奶真系冇得弹，老豆果然冇介绍错。Encore推介六。
小笼包：$40/半打；个馅同云吞个馅好似一样咁，都系肥瘦均匀既猪肉。个皮够薄，不过就唔系好够汁，所以唔系话特别欣赏。
生煎锅贴：$40/半打；又系同一个肥瘦均匀既猪肉馅；个皮虽然厚，不过锅贴系三款之中做得最好食既，因为佢煎得够干身得黎，个汤汁重可以保留喺入面，好啱我口味。饺类推介七。
后记：1) 当日打电话黎订位时，原本想订埋几个大𩠌，点知接线生话除左拆骨鱼头煲要最少一日前订，其他𩠌菜都唔洗订既。食唔倒宁波会招牌之一既拆骨鱼头煲（每份$500），家人友人都有少少失望。
2) 不论大枝或细支，红酒定烈酒，所有酒既开瓶费都系$30一枝，好低。
3) 地点好就脚：巴士，地鐡，的士，小巴乜都到；食完饭重可以行上去老兰饮返杯添。
张贴
