饞。台式食堂 (如心廣場二期)

营业中

休息中

台风将近，放工嗱嗱声买外卖返屋企医肚，拣咗位于如心广场嘅呢间台湾菜，刚开张嘅时候食过，印象唔错，而家外卖自取仲有九折优惠。餐厅嘅抗疫菜单选择虽然唔算多，但台湾菜中最常见嘅盐水鸡、药膳排骨、盐酥鸡、红烧牛腩同卤肉饭之类都应有尽有，而且小食同饮品选择众多，价钱亦算合理。外卖盒分成上下两层，上层系白饭，下层系𩠌菜，唔怕汤汁喺返屋企途中会倒泻，非常贴心。蓬莱米煮成嘅饭够香而且有咬口，洒上少量黑芝麻更加香口；主角红烧炖牛腩够软腍入味，配菜方面有红萝卜同白萝卜。药膳排骨真材实料，骤眼睇都有杞子、红枣、圆肉同党参，排骨肥瘦适中，药材味道香得嚟唔会太重，感觉滋补。炸物拼盘有齐花枝丸、甜不辣同地瓜条，份量两个人分享刚刚好。甜不辣嘅口感有啲似鱼饼，大大件，爽口弹牙。花枝丸口感同样弹牙，夹杂住少量花枝粒，令口感更丰富。整体嚟讲餐厅嘅外卖便当质素可以，价钱亦合理，如果份量再添啲就更加好，疫情之下能够享用到简单嘅台湾风味，而且干净卫生，即使系外卖便当，都已经系一份福气。