榮發咖啡廳

营业中

休息中

汉兴茶档收下午三点，以为只此一家，今日去埋荣发，发现都系收三点。荣发的外貌同（口架）啡呢个用字，睇得见充满怀旧。细心睇，门口右边个饼柜，堆满杂物，正门外仲放咗几个宠物笼添。早餐同橙色快餐店S1餐同样，有一碗粉、一份蛋同热饮，不过冇跟餐多士，仲贵啲添。不过呢，S1系冇得拣叉烧面。呢度的叉烧量多兼够味，肥瘦适中，唔系薄如风干火腿；面，爽口，诚意之作；汤底，非强烈味精制作；炒熟蛋，熟晒得嚟食落滑口，冇快餐店炒蛋咁油腻同饱滞。食晒呢两样野，再干埋杯香奶茶，捧住个肚去迎接一天的工作。舖面保留住六七十年代的绿白色格仔纸皮石，背脊甩皮的凳，云石枱面木制卡座。食客唔多，坐得舒服。如果可以收起叠放墙边的食材同杂物，全面展现窗花在日光下的线条美，会系好靓的画面。