凱旋餐室

营业中

休息中

今日当完值就约老公去湾仔食饭，问佢食乜？唔驶谂，一见到间冰室就走入去，男人的浪漫….既然你问得佢，紧系顺佢意，但估唔到间餐室令我喜出望外。环境光猛，简约平实，干净企理。地方唔少，有多排阔宽嘅卡座，坐得舒适。选择劲多，有晚餐精选、晚巿小菜、烧味、汤饭、粉面、中/西式饭、轻食、二至四人套餐、饮味等。二人套餐配送油菜一碟、白饭、例汤或热饮（$198）系我地最佳选择。在A和B项各选一，我拣咗清蒸石斑，老公就拣川辣口水鸡。例汤系眉豆节瓜猪骨汤（$0），落足料，煲得好够火喉，热辣辣。味道鲜香，唔会太咸，完全无味精，好有家的味道，见老公喝得津津有味就知自己无做好老婆本份，无乜汤水给他….油菜（$0）仲可拣菜心或生菜，贴心！菜心翠绿粗壮，新鲜爽嫩，完全无渣，配些蚝油添咸香。川辣口水鸡 嘅酱料跟平时食唔同，唔止辣酱油咁简单，好似仲有啲豆豉，可能系秘制的。估唔到份量咁足，仲有鸡脾食，开心！黄油鸡皮爽肉嫩，配埋酱料食，咸辣惹味，但无辣到火辣，用来佐白饭一流，正！哗！估唔到系餐室都食到清蒸原条石斑，仲有大大条，喜出望外。好厚肉，啖啖肉，蒸得刚好，嫩滑鲜美，好新鲜，我连头尾都清埋，得！