泰嘟嘟

营业中

休息中

限聚令调整到只可以两个人一枱食饭，于是约朋友去奥运一带行街兼食野，行过哩间餐厅见到都几多人等外卖，于是朋友就话不如哩间，我地好好彩，一入去有两个卡位，卡位甚有特色，设计成泰国的人力嘟嘟车一样，灯光闪闪，别出新面，而店内都挂著好多泰国特色物品，感觉被泰国风情所围绕住。睇下餐牌点餐，我地叫左个去骨猪手煲、冬阴功鲜虾肉碎炒饭、椰青海鲜焗饭、火龙菓芝士沙冰、加咸柠檬梳打水，食物出得好快，朋友杯火龙菓芝士沙冰成杯紫红色，面头有一团白色忌廉状的物体，应该是忌廉芝士，朋友话火龙菓好甜，混埋咸咸地的忌廉芝士味道都几特别。去骨猪手煲既猪手焖得好琳，D肉放落口完全唔洗咬都会松开，皮的部份完全无脂肪，同样好琳好软滑，我食唔停口。冬阴功鲜虾肉碎炒饭好大碟，我分左一半比朋友享用，原本仲奇怪点解无虾系当中个名会叫鲜虾肉碎炒饭？但当食到底时先发现宝物沉归底，个饭虽然叫冬阴功，餐牌上无辣椒图案，仲以为应该唔辣，但食落系有小小辣的。椰青海鲜焗饭，饭当中有好多嫩滑既鱿鱼条，饭面有两只青口加两只无壳既虾，方便食用，而椰青内的饭加左椰浆混和，食落甜甜流流。食饱饱未到九点，同朋友系店内打卡先埋单。