康樂園鄉村俱樂部 (已結業)

Item: 康樂園鄉村俱樂部
Rating: 3
Author: 奧志雷

The Country Club at Hong Lok Yuen

6 食记

味道

环境

服务

卫生

抵食

156

大埔

$101-200

港式西式海鲜薄饼会所

奧志雷

等级4

2.1K

是晚囍宴 menu，阿姐嫁女喇。我淨係掛住食架乍 ﹗一坐低梗係研究有咩好野食啦，哈哈。酒就唔多想飲，留肚食好野。幾十年來應該係第二或第三次入到黎康樂園，甚少踏足之地。時間晚上約七點半，好多賓客還未到場。九點大家都坐停定預備開餐，之前都係先欣賞一對新人既結緍片段啦 ﹗好肚餓呀 ﹗大家都非常聚精會神欣賞片段，不過一路個心諗住幾時先開飯架。大紅乳豬全體，掙左對眼喎，無左啲車厘子或燈膽唔係好慣 ﹗皮脆肉嫩，豬味濃而咸香適中，啖啖肉又不會肥，燒得層皮卜卜脆，靚豬 ﹗好味 ﹗一見豬腳仔梗係要即食啦 ﹗啖啖肉，彈牙嫩口。大家都餓喇，搶呀！翡翠腰果蝦球，由細到大我都食唔到西芹陣青味架呢 ﹗蝦球啖啖肉但欠爽口，腍中帶霉，失敗 ﹗味道唔錯，香口就夠香口喇。百子千孫柱甫，有乾瑤柱、冬菇、小棠菜同炸蒜子，我最最最喜愛既一道菜 ﹗瑤柱蒸得軟腍又充滿海味味道，冬菇香甜爽滑菇味濃。小棠菜撈埋蠔油芡同吃，鮮爽。樣樣都好，正 ﹗超水準，唔好停，食多啲。煙肉百花帶子，掛住食唔記得影相喇！帶子棉滑、蝦膠鮮味彈牙，加上煙肉既咸香而帶嚥韌既口感，味道好豐富！好味道！如果可以再熱啲就更正！紅燒海皇鮑翅，最初見到紅燒翅諗住係普通野，但發現鮑翅係一梳梳架，足料無欺場。高湯甜美，厚薄剛好，混入蟹肉、蝦肉、竹笙，更添鮮味 ﹗加係浙醋好醒胃，正呀 ﹗鮑片扒時蔬，南非鮮鮑都係咁上下啦，鞋鞋地又有點嚥靭，帶點點鮑味。反而個鮑汁生菜好正啊！爽甜鮮嫩又多汁！整體都滿意既。清蒸老虎斑，侍應哥哥特別地會將整條斑完全起骨，Good ﹗大部份酒樓只會用匙羹急急刮晒啲肉出黎就算。簡單的蔥絲、豉油同熟油烹調，魚味香濃。啖啖肉，味道同質地穩陣大路。最好食既部份係魚肚、魚鰭、魚尾、魚三角，又滑又膠，好味。魚身肉質厚而有咬口，最爽滑彈牙既，當然係臉珠登啦 ﹗整條魚，大家合力完全消滅，連渣都無剩！南乳脆皮雞，先試試原味既脆皮雞，味濃滑溜香脆，皮脆肉嫰，非常好 ﹗隻雞無癡肥，肥瘦適中，皮夠薄而肉質結實有彈性。再加南乳醬試試，南乳醬係溝稀左既，淡淡南乳味，不太嗆。點唔點南乳醬無咩分別，要用重味南乳醬先能夠突出到炸子雞同南乳吊燒雞既不同之處架麻。鮮蝦荷葉焗飯，濕淋淋既飯，最討厭 ﹗仲有股濃烈唔知係芫茜定係芹菜味道，我好怕依種味。金菇瑤柱伊麵，濕腍散碎，講完！食唔到瑤柱味，亦見唔到瑤柱絲，其實係咪瑤柱汁伊麵乍？只食到金菇、牙菜同韮皇，差 ﹗過埋最後既恐怖雙殺後，今晚既喜宴就完滿結束喇 ﹗祝永結同心、白頭到老！大紅乳豬全體、翡翠腰果蝦球、百子千孫柱甫、煙肉百花帶子、紅燒海皇鮑翅、鮑片扒時蔬、清蒸老虎斑、南乳脆皮雞、鮮蝦荷葉飯、金菇瑤柱伊麵、百年好合、永結同心、環球果盤，完滿結束。