美心皇宮

营业中

休息中

呢间美心皇宫屹立沙田好多年，因为对住河景感觉都系比较高档，今日偶然发现佢竟然有晚市火锅任食，咁就一定要试下啦。佢嘅价钱系星期一至四晚每位$158，分两个时段，六点或者八点开始，任食100分钟。如果星期六日或者公众假期价钱就系$178。另外茶钱及酱料每人$10，再有加一。一坐低每人首先会送两只蚝，只有一次唔可以再嗌。任食嘅食物种类都好多，我哋样样都有嗌啲，除咗牛肉之外一般质素都唔错，印象比较深嘅包括有佢哋嘅鲮鱼滑、虾滑同花枝滑，用料足唔会只系一团粉。另外佢啲海鲜都唔错，有虾有蚬有花胶仔，最有惊喜系佢嘅白鳝柳，好少任食火锅嘅白鳝有咁厚身同新鲜，好食到唔记得影相！不过佢上菜嘅方式系集齐你嗌张单嘅所有食物一次过送嚟，我第一转可能嗌咗比较多食物，结果要差唔多30分钟先上第一转食物，结果唔系好够时间食，有啲可惜。如果再去就可能第一次嗌少啲，之后再加，可能会好啲。整体而言，呢个任食火锅系抵食嘅。虽然佢哋可能新做任食火锅有啲甩漏，不过职员服务都算好好。另外佢哋可能有酒席未必晚晚会有任食火锅，所以都系打电话订位最稳阵。