名川麵棧 (已結業)

黎大桥街市买𩠌，顺便食埋个晏先，来左名川食，呢间店都有左好多年，虽然叫面栈，但其实有好多野食。一坐低店员就送上热水同餐具，枱面同调味品等摸落无痴立立，感觉很干净。点了个饭，有例汤送，是日例汤系菜干猪骨汤，汤几甜，饮完无口渴，正㖞。天气咁热叫返杯冻饮先，谂紧要红豆奶茶好定凉粉奶茶好，点知店员话可以两沟，又好㖞，咁就整杯红豆凉粉奶茶啦，哈哈。奶茶很香滑，红豆甜甜的又够绵，仲有爽口凉粉增加口感，好饮㖞，最正系店员提醒红豆已经够甜，所以话杯奶茶走甜会好啲，又真系㖞，咁样好啱口味。餐牌实在太多野拣啦，左谂右谂，见人地食鸡饭好正咁就点呢样啦，沙姜盐焗鸡饭～鸡脾黎㖞，虽然卖相有啲乱，但份量挺大呀。鸡件少少咸够哂味，肉嫩滑，鸡皮下又无太多肥膏，好味。点埋个沙茶姜酱无得顶，呢个酱真系好好味。饭大大碗，仲撘条菜添。见佢个小食list居然有大阪章鱼烧，好奇心下叫左份黎试下，呢啲咁传统嘅小店居然有小丸子食？！卖相似模似样㖞，上枱时仲好香添。小丸子个size比专门店小一点，但一样做到外脆内软，粒粒有章鱼肉，加上酱汁够多一啲都唔姑寒，好食呀～食两样野再加埋杯野饮饱到上心口呀，超满足的一餐。