江南庭敘 (已結業)

想食质素高嘅打边炉，咁就要行多两步！今日就深入去到九龙湾嘅江南庭叙，同朋友一齐试吓呢间工业区嘅绿州！打边炉最重要一定系汤底，唔通真系个炉咩？今次就选择蕃茄排骨汤底，除咗好浓蕃茄味，仲有好多排骨，开始打边炉前，饮咗啖汤，酸酸甜甜，好fresh呀！沙巴龙虿 $388：脆肉鲩系好好味，之但系今日见到龙虿好新鲜，一于叫一条豪一豪，师傅刀工好，每件鱼都起晒骨，加上非常新鲜，好弹牙！安格斯肥牛$248、手切肥牛$328：两款嘅牛味都好浓，加上大大碟，真系好抵食。其中手切肥牛较厚身，有咬口；而安格斯肥牛就脂肪分布平均，入口软腍。云吞$98：云吞皮够晒薄，入面仲有大大只超弹牙嘅虾同猪肉，一咬落去就有好多汁流出嚟，好新鲜呀！四宝丸$98：四宝丸有墨鱼、鲜虾、牛肉同猪肉，全部都系新鲜打造，入口弹牙，其中最正系墨鱼丸，墨鱼味劲香浓!呢餐都几满意，好耐无食过咁有质素既火锅，行远少少都值。