京笹居酒屋

营业中

休息中

呢间系日本朋友介绍嘅，估唔到外表平平无奇，入到去好似入咗随意门咁，睇到个过胶menu 同手写餐牌，耳边日文交谈声不绝于耳，顿时有种“返乡下”feel。佢菜式种类好丰富，睇menu 都有排拣。佢话池鱼当造所以叫咗个池鱼刺身。我其实唔钟意sashimi ，因为好怕海水味，有都净系食拖罗同河豚，但呢个池鱼刺身有鱼味得来完全唔腥，连我呢啲非刺身爱好者都食唔停口。同埋佢卖得好快，好彩我哋叫咗最后一条。最最最令我惊喜系，佢起左啲肉出嚟，会将条鱼骨摆去炸埋畀你食！劲香劲好味，配啤酒一流！佢啲嘢食卖相睇落好普通，好似啲日式家庭料理，冇乜味精，反而有种地道风味。牛肠唔腥，野菜鲜嫩香甜。见隔离枱日本人叫左串梅子鸡咁我又跟单先，上面嘅紫苏叶令成个味道升华。鸡皮饺子同炒面都系水准之内，不过佢咁多菜式真系唔建议食太多淀粉质啦。葱拖罗卷都好有油脂味，唔似平时街外好多淡牟牟。绿茶烧酒同柠檬烧酒就一般啦，冇乜酒味。但总括而言佢个价钱同份量喺香港嘅居酒屋入面算系咁，加埋气氛衬托，老世员工客人都系日本人，又会同你倾下计，系几有人情味，真系会忘记呢度系香港，值得一再光临。