高街麵霸 (已結業)

想试呢间车仔面嘅原因系因为佢有鸡子食，无错！系鸡子，同身边朋友打边炉，一听到鸡子，大部份嘅朋友反应都系当我异形咁，见到佢哋嘅厌弃眼神，为免影响朋友食欲，所以往往都会放弃呢个咁孤独嘅选择。车仔面有得拣鸡子仲唔系开正我果「饭」！一入嚟见到好几枱都系外国人，店员们比较内敛一D，有位就自己坐啦！我拣咗推介嘅卤水鸡子，麻辣芽菜，卤水猪腩片，面底拣推介嘅刀削面，汤底系腩汁麻辣（两只椒中辣）。 面份量对女士嚟讲适中，男人未必够饱。刀削面未见突出，以为推介会好得，面质唔够弹牙，同超市买嘅面差唔多感觉。芽菜爽口带少少麻辣味，鸡子卤得刚好，唔会煮到烂晒！卤水猪腩片都好入味，食落有浓浓嘅卤水汁味道，腩片皮油入口溶化，但肉质就唔够松软。 汤底都几浓，不过可能我选麻辣中辣，所以已经食唔到腩汁味。中辣都几辣吓，同埋都几多花椒粒，食到个咀犹如有千万只热锅上的蚂蚁在跳动咁！呢个时候就醒起我order咗嘅乌龙茶呢？！原来系店员漏咗单呀！蚂蚁在舞动全唇呀！！！另外我试堆朋友叫嘅蚝皇冬菇，佢用鲜冬菇炆，冬菇嘅甜度应该系落咗糖去炆，汤底系清汤小麻辣，呢个啱D唔太食得辣嘅朋友选择。