泰國人海南雞 (已結業)

呢间嘢完全唔掂!!好后悔同女友响间咁嘢度食咗个lunch。当日我哋较迟食饭(约1点半)，因此未有其他网友要等位情况出现，顺利入座。环境其实算唔错，你唔介意响马路边较开扬好似多啲尘咁就ok(我自己其实唔介意)，起码地方都ok阔落又算干净。不过叫嘢食就出事。我自己叫左个卤水鸭金边粉，我女友就要海南鸡饭，结果我个粉到左食完佢个饭都未嚟。２０分钟催一次，个男侍应叫我哋等等，亦见到佢有帮我哋追。３０分钟再催，另外一个女侍应就咁嗌入去厨房话漏左单就算，但我听到附近几枱都漏单漏海南鸡饭。结果要我哋拍晒枱，成间都知我哋个鸡饭要等４０分钟，先至有个饭到，仲连sorry都久奉，认真要揾华仔拍醒佢哋。讲返嘢食，个卤水鸭金边粉都算不过不失，系份量细啲唔系好够食。我本身已经细食，呢个粉都要我后尾食返个热狗先顶到肚饿，份量多少你哋自己想像。至于招牌海南鸡饭，鸡尚算滑，不过我稍嫌太肥而且鸡味不足，但个鸡汁就ok，至于鸡油饭就稍嫌太硬身唔够香滑。总体嚟讲，呢间嘢啲嘢食质素已经比唔上同区附近既泰x鸡，仲有咁既九流服务，我觉得大家就无谓撞板。