上海弄堂菜肉餛飩 (已結業)

年三十想食上海菜应节，决定行远少少黎到想食好耐既上海弄堂，估唔到唔洗等位即入。菜肉馄饨 ($48) 8只馄饨塞满爽脆、厚而嫩既小棠菜粒，肉比例少，但鲜味十足，金元宝式折法亦食到薄馄饨皮既烟韧。 洒满葱花既豉油汤底温和唔会腻，充满家常味道。醉鸡担担面 ($75)花雕酒味浓郁，余味有少少酒糟既微苦；鸡皮下呈啫喱状，可惜分到胸位，啖啖肉但鸡脾肯定更加满足。 小辣担担面浓稠度有如摊冻既花胶汤，我钟意花生味唔会过重，肉燥、葱粒同香辣汤汁浆住软滑既幼面条，必试。排骨汤面 ($59)排骨大块厚肉、嫩滑入味，炸浆偏粉状薄身，唔算十分酥脆，胜在干爽同排骨本身够好味。 朋友唔食得辣叫左汤面，清澈既鸡汤清爽鲜甜，但份量较少，单点一份未必够饱。年三十只可以散叫，平日其实有$86 set包左醉鸡担担面同4只馄饨，今次相同组合比平时贵左少少，但份量好足好饱。 我钟意套餐配搭好自由，可选馄饨、醉鸡、排骨、无锡排骨、狮子头等，配汤面、菜饭或担担面(+$10)，茶芥$3，环境几靓，上海瘾起时可算经济实惠之选。 下次再战~