正宗上海生煎皇 (已結業)

今日朋友话去食明星餐馆，话系食小笼包好出名嘅。去到餐厅，舖头有啲狭窄，完全系隐世小店feel，于是我抱住期望入去食。佢系用剔剔纸俾你自己剔，见到啲价钱都系三十蚊左右，感觉唔贵，就叫返几味咁啦。当然小笼包是必须点的，话晒人地招牌，一试便知龙与凤啦。个皮又唔会好厚，但又唔系真系好薄好惊喜。佢个汤汁比较清，唔会好似有啲小笼包咁甜到好唔自然。呢个价钱算系抵食。生煎包系我朋友今次嚟嘅目的，因为我好怕油，所以冇试，但睇朋友食佢一咬就爆汁，好利害咁😂虽然卖相唔吸引，但佢话几好食。嗌左个九菜水饺，普普通通，冇九菜味都有猪肉嘅鲜甜味，冇话特别好食或唔好食，可以填下肚咁。海折青瓜，海折淡如水，冇味。因为个汁都好淡，所以青瓜都系青瓜味，冇汁可言。肴肉几好食，味道岩岩好，唔会太咸，呢个唔错。川麻鸡翼，我又系忘记左影相，所以其实佢系一碟四只。佢个样似土匪鸡翼，但系味道都系偏淡，小小小小小丁咁点嘅麻，唔辣，都系冇乜特别。两个人食，呢个价钱中规中矩啦，因为佢碟碟都细细碟，份量唔多。只要唔系饿左两餐先去食都ok嘅。