風雲丸

营业中

休息中

咁耐冇去过日本，成日好想食日本嘢解一解思乡之情，今日就去咗尖沙咀K11对面嘅风云丸食沾面。朋友叫咗个豚骨鱼介味玉沾面，先试咗一啖汤，有好重嘅鱼介海鲜味，同时有好浓厚嘅猪骨香。配料嘅叉烧肥瘦适中，唔会太多肥膏，仲有一只溏心蛋，蛋黄有少少半熟，味道带甜，蛋白就有豉油嘅味道。 我就试咗佢哋嘅期间限定天使赤海老樱花虾沾面，汤底比朋友𠮶碗更重海鲜味，而且有好多樱花虾干，捞沾面食嘅时候食极都仲有。配料有更多樱花虾干之余，仲有好一大只虾同蔬菜，面条呈粉红色，好少女心～餐厅可以畀客人选择温面或者冷面，我同朋友都拣咗温面，面身偏软熟。如果觉得汤底味道太浓，仲可以加少少柠檬汁中和返口感。我哋叫咗辛口唐扬炸鸡做小食，辛味粉非常足料，食落好够辣，啱啲钟意食辣嘢嘅人，炸鸡鸡肉juicy，皮脆得嚟唔会太油。香松饭有好多紫菜同调味粉，就咁捞饭食都好好食。但系食完沾面之后再捞埋净低嘅汤底，味道非常之浓烈，白饭均匀咁吸收咗汤汁，别有一番风味。如果已经够饱唔想食饭，可以要求加啲鱼介清汤落净低嘅汤底直接饮用。