丼瀛 (已結業)

今日系好多嘢食嘅庙街入面拣咗呢间日本菜同我朋友食晚餐。其中一个原因系因为觉得佢个筑地寿司杯好特别，包罗万有，好想试吓。第一个上既菜式就系佢，先食鲍鱼片，非常爽口弹牙，啲虾都好新鲜好大只，但重头戏系黑松露海胆同埋三文鱼，我认为系黎到必叫！首先比佢地既色泽吸引住，海胆肥厚，浓郁甘甜，再加埋黑松露独特既味道，两者好match，会在口中会慢慢溶化。三文鱼则片片新鲜肥厚、肉质细嫩、口感爽滑。第二道菜黎嘅系牛舌，因为我朋友钟意食所以叫左，几爽口，唔会"韧"。主食先上既系黑松露海胆炒饭，海胆依旧肥厚甘甜，今次比较原汁原味冇咗黑松露嘅衬托但都不失色，但个人较喜爱同黑松露一齐食，炒饭粒粒分明同干身，仲有黑松露增加左炒饭既香味。之后再嚟一个小食 唐扬炸鸡，热辣辣出场，都能做到外脆内软，肉质嫩滑。最后黎个安格斯牛肉寿喜锅，个汤好清甜，配合埋娃娃菜金针菇牛肉咁食，为每样食物加添左一份清甜，令人回味，而且份量都好多，食埋佢之后感到非常满足。同食放题一样咁饱，价钱同食放题差唔多，但食物质素比放题高，食物种类繁多，值得一试。