意粉狂熱 (皇室堡) (已結業)

话说皇室堡商场重建后，基本上除咗睇戏，都无系呢到食过嘢，今次陪朋友系到买嘢，顺便就系到食餐饭。因为大家都想食啲香口嘢，所以今次拣左呢间Pastaholic，价钱亦几合理，环境都几舒服，唔系太嘈。两丁友怕眼大肚窄，所以唔敢叫得太多嘢食。等左一阵就有嘢食到，首先系烟肉杂菇蕃茄忌廉意粉，一食落口就觉得好舒服，有轻微嘅蕃茄酸味，味道啱啱好，唔会盖过晒其他味。再黎就系黄金四重芝士披萨，对我黎讲PIZZA简简单单已经好好食，就咁食就有淡淡芝士味，加啲附上既蜜糖酱，就会有第二种味道，甜甜地好吸引，我比较钟意加蜜糖酱既味道。之后就系脆炸原条白身鱼配有皮薯角，鱼块炸得好好，鱼肉仲好滑，薯角就无咩特别。各自点咗杯饮品，分别系鲜水果茶同西班牙白鸡尾酒，鸡尾酒带少少酸味仲有微微既水果香，而鲜水果茶，茶味几特别唔太甜带少少幽香果味。最后朋友再叫咗杯朱古力芭菲，我只系食咗一两啖，有几种唔同既口感，几过瘾。总结，下次个PIZZA可以叫大啲。