鹿鳴春飯店 (已結業)

父亲节前夕，就同屋企人带公公去食餐怀旧京菜。我哋散点，啲菜式好多都有分大、中、细，帮我哋落单嘅侍应好好人，见我哋叫叫下叫咗劲多嘢食就主动建议我哋改细份量，之后都真系好彩份量减咗，如果唔系真系会食唔晒。 呢间餐厅必食北京填鸭啦！啲鸭真系几好食，但食嘅时候包鸭嘅皮已经冻晒就扣咗少少分，建议餐厅唔好系鸭未上菜嘅时候就上咗薄饼皮先，搞到啲薄饼皮放到冻冰冰真系令到个北京填鸭失色不少。仲有几样较为出色嘅有砂锅云吞鸡(汤浓，云吞皮够薄)、京烧羊肉(啲肉好嫩)、高力豆沙(炸得几好又唔会太甜)、铁板焗鲥鱼(条鱼有成只手臂咁长，鱼肉甘香，配埋酸酸哋嘅汁又几特别同好食) 、葱油饼(啲葱油好香)。而清炒虾仁、花素蒸饺、锅烧肘子就一般，不过不失啦。至于比较差嘅代表就系小笼包(皮太厚，肉汁亦唔够多)、云腿津白(菜煮得太淋，又冇乜云腿味)、什锦冷盘(拼盘内冇一样嘢好色，失望)。