奧壽司

营业中

休息中

呢个星期去到几偏远下的数码港，扮下上等人食贵价日本野。闲日夜晚黎食，系呢头黎讲预左唔会多人，地方阔落尚算清静，吧台位仲可以见到三位师傅即时处理刺身等。小弟点左一份细的寿司拼盘，总共9款寿司，除左加州卷外每款一件，望落刺身算晶莹剔透，唔点寿司豉油食都有份鲜味系度，寿司饭食落仲系暖暖地，唔似出面果d整到冻冰冰。另外点左份刺身拼盘，有小弟最爱食的吞拿鱼，食落一d都唔「鞋」，同其他刺身一样都系厚切，唔系好舍得一啖吞哂成件，鱼类唔腥，几肥美，虾好鲜甜。因为小弟钟意食刺身，所以跟风叫左个是日special, 都系刺身类叫金目鲷，肉色几嫩，带粉红色，肉质厚实带点爽甜，除左有少少鱼筋之外差唔多全部都系入口即溶，几好食。之后再叫左几份小食，烧鱿鱼筒，火侯还好，唔会烧到太㶶太韧，汁唔算多但系都够哂味，有点似离岛的烩鱿鱼风味。饺子酿鸡翼，烧得唔错，饺子肉同个汁几夹，可惜的系两款热食可能之前摆耐左，唔算太热。最后一款系特色三文鱼，即系三文鱼鱼生粒伴青瓜丝及鹌春蛋，不过可能自己食唔惯生的鹌春蛋，拌埋一齐之后有点腻。不过加上松子仁，多重口感都ok。总括黎讲，寿司刺身类还是较好，最紧要刺身真系好新鲜。