佳記粉麵茶餐廳

营业中

休息中

是日啲食饭时间调到乱七八糟，差唔多成五点钟先食第二餐饭。经过苏杭街，就紧系唔会错过揾好嘢食嘅机会啦！眼利嘅阿K一眼就望到远处嘅「佳记」。根据阿K记忆所及，「佳记」原本响旧北角码头度，自从码头拆咗之后就唔知去咗边度，是日终于俾佢撞番。一入到舖头入面，就俾「竹升手打面」呢几只字吸引。见下午茶餐仲有得供应，我就二话不说嗌咗一碗猪手面加咖啡。猪手已经炆得好腍，可以一路食一路啜关节附近嘅软骨，十分好食；手打面不愧为手打面，面质烟韧又有面味，一啲枧水味都冇，属于上品；咖啡系即磨咖啡，咖啡味好香好醒神，唔似普通茶餐厅嘅酸到死翻煲咖啡。阿K叫咗碗鸡脾公仔面，虽然炸鸡脾都整得唔错，但相比之下冇猪手面咁印象深刻。一个下午茶餐只系十八蚊，已经有面食同即磨咖啡饮，抵过咖啡连锁店廿几蚊一杯嘅咖啡好多，而且手打面一啲都唔马虎，是去食下午茶餐嘅不二之选。