泰Grill (恆隆銀行大廈) (已搬遷) 新店位置

约咗朋友喺尖沙咀行街睇戏，行到攰攰地又有啲肚饿，朋友提议去食泰国菜。我哋就去咗位于加连威老道美食坊入面嘅「泰Grill」。呢个美食坊装修富有70年代怀旧风格，同其他food court最大嘅分别就系有亲切嘅店员替你落单、攞碗筷、斟水同埋将食物送到枱上，真系服务一流。海南鸡饭（$70）鸡肉嫩滑冇骨，空口可以食到鸡肉原味；如果沾上两款泰国酱汁，别有一番风味。鸡油饭相当大碗，差唔多等于其他餐厅两碗嘅份量。附送嘅清鸡汤看似淡然无味，其实只要浅尝一口，就会发现佢鲜甜浓郁。串烧半打（鸡、牛、猪）（$88）串烧大大串，烤得焦香，肉质松软，腌料惹味而且带有少少黑椒粒。沙嗲汁浓稠刚好，多花生粒，串烧蘸上酱汁伴食，更加美味。烧蚝（$35）即叫即烧，上枱时热辣辣，同好似自己喺炉前面烧一样。蚝肉唔腥，配上蒜蓉、调味料同青葱，一啖一只啱啱好。如果想舒舒服服咁食一餐CP值高嘅泰国菜的话，「泰Grill」系一个好选择。