六両三 (已結業)

呢間同路人開嘅台灣店經常大排長龍，我去嘅時候仲有得做晚市，約六點到可直入，食物質素唔錯，而且幾抵食。🍽牛腱牛肋條麵:朋友唔鍾意食牛筋所以揀左呢款，湯可以揀川味紅燒或麻辣，我地揀左前者，辣味比較明顯，麵質係粗麵，好處係口感煙韌，但就無咁索湯，牛腱紋路好靚，肉味濃而且好淋，非常好食，牛肋條就韌左少少。🍽滷肉飯 (小):雖然話係細份，但兩個女仔分都夠食。滷肉煮到好淋，半肥瘦，個汁撈飯一流，大推！🍽切豆干(小)/甜不辣(小)/燙青菜:另外叫左幾個小食，第一次食甜不辣，味道似魚餅，口感就似扁身嘅韓式年糕粉粉地，其他就係平時食開嘅味道，燙青菜配滷肉汁，份量都唔少。P.S. 門外寫明疫情關係，用膳時間最多40分鐘，但食餐飯40分鐘真係有啲勉強，會唔會改善下店面嘅間隔更有用呢？當日我地兩人獲安排坐四人枱，中間無間隔(利申長枱有嘅)，食到一半有人搭枱，店員竟然叫我地改為打橫坐(即係對住陌生人食飯)，最後梗係無人聽佢講啦。