讚好台灣

营业中

休息中

经过红磡呢间赞好台湾嘅装修好似几舒服，又见到闲日都坐满晒人，就决定试吓啦。嘢食方面都几多选择，有饭、汤面、拌面、小食同嘢饮。主菜我哋要咗两碗蕃茄汤面。我要咗鲜蕃茄猪软骨汤面，拣咗新竹米粉。个汤底超级浓郁，好香蕃茄味，米粉嘅份量都几多，猪软骨煮到好腍好入味，好好食。朋友就要咗丰盛牛肉面，有金钱牛腱、牛腩、牛筋、花枝丸同贡丸，材料丰富。我试咗佢嘅牛腩，肥瘦均匀，好香牛肉味，朋友都好钟意佢个汤底。小食要咗木鱼酥皮蛋豆腐，系冷豆腐上面有皮蛋，仲有好多肉松同木鱼，估唔到所有嘢都好夹，食落个口感真系好特别。另外要咗大盐酥鸡同甘梅脆薯。盐酥鸡卖相好靓，外面脆得嚟鸡肉够腍，如果可以再热啲就好啦。甘梅脆薯系唔同嘅炸法，外脆内甜，上面𠮶啲甜甜哋嘅粉同炸物真系好夹。饮品方面我想饮啲清新啲嘅嘢，所以要咗冻蜂蜜柚子茶，甜甜哋咁好解渴，同啲嘢食都好夹。朋友就要咗蜂蜜柠檬茶，都话好饮。见到人哋饮黑糖鲜奶好似都好好饮，下次一于试吓啦。