七輪燒肉 (已結業)

识咗𠮶住港岛西嘅朋友，自然要嚟觅食啦。依间烧肉喺正地铁站对面，位置方便就脚，店舖开扬，坐嘅位置都几宽阔。酱料碟有柠檬、烧肉汁同葱油，我基本上都系点烧肉汁同柠檬，比较开胃清爽，朋友就点葱油，味道厚郁。嗌咗套餐有包饮品，我点咗巨峰葡萄梳打，唔算甜又几香，朋友点嘅可尔必思青柠梳打都唔错，饮炭酸饮料配烧肉系一件几开心嘅事，够清凉。沙律系和风沙律，有洋葱、蕃茄，酸甜开胃，另外有附味噌汤，仲有蚬喺入面。前菜我哋拣咗牛舌煮同辣汁鸡肝，牛舌都几肥美，汁香软嫩；鸡肝嘅辣味都几令人食唔停，仲有菇喺入面添。主角牛拼盘，唔算好肥美，但几有牛味，唔洗烧太耐都有得食，我最中意牛肉串，有种食串烧嘅味道喺度，牛肉又鲜嫩。鳗鱼炒饭有惊喜，调味好食，仲真系有粒粒鳗鱼喺入面，不过就唔算多。菜我哋就点咗芝士杂菜，点知都系菇😹但系系开心嘅因为我钟意食菇多啲。最后用雀巢甜点作结。总结嚟讲套餐非常抵食，两个人捧住个肚走，质素又唔差，可以一试。