海港酒家

营业中

休息中

酒楼八点开舖，我7:45已经去到酒楼门口。当时门口大约聚集咗十几个人。未够八点职员已经开门俾大家入去坐低。行到入去以为随便冇人坐嘅位置就可以坐低。原来呢个谂法系完全错嘅。每次准备坐低都会有人大声叫「呢张有人，你坐第二张」。最初我以为只系食客帮朋友霸位，但系当我尝试到第三张枱嘅时候，我系俾个职员叫我坐第二张枱。职员同我讲呢张枱要留返比个熟客。如是者我就再咁样搬嚟搬去，总共试咗5张枱，终于成功坐低咗。坐低咗之后我再望一望四周嘅情况，差唔多有半间酒楼都系比熟客留低咗。真心觉得：一系有心做熟客每日嚟帮衬，一系我就以后都唔嚟帮衬。酒楼想留低熟客呢个我好明白。做生意一定系咁。但系可唔可以安排好少少呢？至少好似我呢啲咁嘅生客，都唔需要俾人当人球咁踢黎踢去！！你冇生客，以后又点会有熟客呢？讲返食物，其实质素唔差，而且都几抵食。如果唔介意有机会做人球，又或者谂住以后每日都嚟帮衬成为熟客，我觉得呢间嘢都值得嚟帮衬嘅。