花園餐廳 (已結業)

自从裕民坊阁楼舖嘅花园搬迁之后，一直都食唔返旧时嘅豉油扒风味。由于近期肥仔奇做健身Keep Fit，教练话要食多啲牛肉补充铁质，适逢路过位于亚士厘道嘅呢间花园，姑且入去试试。眼见晚餐约九十蚊嘅餐牌上冇牛，于是索性食豪啲，点咗份连加一要142蚊嘅A级纽西兰肉眼。铁板未到，红汤先行。汤入面已煮腍嘅蔬菜甚少，椰菜爽口即系后加，唔系原煲熬成。当茄膏味胜于汤中一切之时，我就隐隐索到一阵嚟𠮶份扒嘅伏味。餐包微暖唔热，但仍算软熟。呢款牛油不比从前嘅牌子香口，唔明点解要转。久违了嘅碎雪冻柠茶。乜嘢系碎雪？宜家好多餐厅嘅冻饮都系买冰厂交嚟嘅冰块，只有自家舖头有制冰机方能见到呢种粒粒只有波子咁大嘅碎雪，亦因为够碎，笃柠檬嘅时候就唔会畀啲冰阻住哂。花园嘅冻柠茶向来都系要柠味有柠味，要茶味有茶味，茶色通透泛红唔混浊，咁饮入去就冇涩味。点咗七成熟，落个蒜茸汁。裕民坊阁仔时代嘅花园，扒底薯菜例牌系小棠菜，估唔到呢度用西兰花，咬落生生哋。薯条一如既往嘅唔脆，早在意料之内，犹幸呢款薯条一向以薯味取胜。一切开就知中伏，我要七成，佢熟到十成，咬落啖啖都系渣，纵然称得上肉眼嘅牛扒点差都会有啲牛味，奈何每一啖都系粗纤维嘅口感