麺屋武蔵虎洞 (青衣城) (已結業)

好耐冇去呢间拉面喇，原因系佢啲面都几……普通，价钱同出面比较系平10蚊左右，不过出面好食嘅拉面真系好多，所以都好少再黎食，咁岩今晚大少话想食拉面，于是就去返呢间，近近地呀麻！星期一唔洗等位，仲有卡位坐，几好，一坐低见到新出一款沾面，仲要系香菇浓汤，一于试下佢，85蚊一碗，加5蚊有半只蛋，加18蚊仲有个薯仔南瓜鸡肉沙律！鸡肉沙律嘅南瓜好甜好食，但系薯仔呢……好爽口啰，好似未煮熟咁，而且冇薯仔味架㖞，但整体都算好食，同埋都算多嘅！主角出场，一黎到已经闻到好香菇味，如果钟意菇嘅朋友都真系要试，而佢个面上面都有三款菇，仲要系用牛油，黑椒炒过，好香口，个汤系劲浓，虽然偏咸少少，如果唔浸咁多都好好食，香浓菇味，真心觉得好食，不过我地个汤唔热嘅，之后都听到好多客要佢地翻热个汤。到我地走时见到其他人个汤系有烟出，希望佢地会改善一下。另外有样嘢，之前黎几次都觉得好热，经理仲同我地讲，系个商场冷气问题，而且佢地都知出面食拉面应该系俾冰水，而佢地只系俾热茶，今次黎啲茶就冇咁热，不过我都系食到出汗。