味道樂居酒屋 (元州街) (已結業)

长沙湾呢间日本餐厅，星期六都有lunch set提供，而且有几多选择，味道都唔错。每个lunch set都包左前菜沙律、面豉汤、茶碗蒸。沙律菜都几新鲜，生菜爽脆，仲有蕃茄同埋日本小番薯，配料一啲都唔马虎，配上日式麻酱味道好好。面豉汤就正常嘅质素，唔会过咸。茶碗蒸都好味，蛋非常嫩滑，配料就有啲蟹柳。便当$98选择困难症拣呢个就啱晒，因为咩都有啲，可以食到好多款嘢食。有三点刺身、饺子两只、唐扬炸鸡两件、枝豆、黑松露糖心蛋、鳗鱼饭。刺身新鲜，三文鱼厚切，而且肥美。饺子脆卜卜，炸鸡炸粉厚度刚好，啖啖肉。黑松露糖心蛋松露味好香，出奇地好食。鳗鱼饭估唔到有成半条鳗鱼，非常足料，鳗鱼都算厚身，肥美，冇骨而且唔腥，配上鳗鱼汁捞饭味道好好。牛油香煎银鳕鱼拼大虾丼$108我本身好钟意食银雪鱼，鱼油丰富，肉质嫩，鱼味亦都好香。呢个银雪鱼系煎香左之后再加上黑椒烧汁，所以味道都几惹味，唔腥。大虾亦都煎得好香，肉质爽口。配料仲有半只糖心蛋，用黑椒烧汁加上紫菜丝捞饭，食到舔舔脷。