Hayashi Japanese Cuisine (已結業)

同靓女C揾嘢食，原本冇谂过食家庭料理，误打误撞嚟咗呢度，坐低咗就随遇而安。两个人叫一汤二菜，可以分享试唔同嘢。大家口味好似，冇异议下响27款当中好自然拣咗以下几款主食。先上小食3款，摆碟卖相精致。渍牛蒡、菜、萝卜调味冇过咸又爽口。上汤啫喱白鱼味道带微酸。滑潺潺嘅海藻，衬煮过嘅炸三文鱼，甜咸适中。主菜炸鸡调味椒盐适中，皮脆卜卜，欲罢不能，我少有地食哂啲皮。伴碟嘅椰菜丝以芝麻酱略拌，爽甜带香。汉堡扒松软有肉汁，日本咖哩汁不辣带甜，伴以带胶质日本白饭仲要任添，人生一乐。春菜天麸罗炸酱薄，食落不油腻，基本上唔知咩嚟，有啲葱条、葱头、春笋、菜、叶等，非常嫰口，有趣。西京烧银雪鱼肉质带实，底味带咸，面酱带甜，好味。面豉汤浓味恰好，除咗海藻仲有芹菜，饮落有种若隐若现淡淡腊肉味。鸡蛋布甸幼滑富蛋香，蜜甜味适中。即磨咖啡滞涩甘香，味道不错。整体食物质素非常高，碗碟摆位餐具靓，冇乜挑剔位。有啲𩠌较漏，两个人分享食啱啱好。令我对日本家庭料理改观。