峰景餐廳 (已搬遷) 新店位置

结婚话咁快一年, 在这个一周年纪念日, 我地决定重游啱啱拍拖果阵去过的山顶庆祝. 当年大家读紧书, 无个钱旁身, 连用游客价食个M记都唔舍得, 结果系百佳买即食野叮黎食. 故地重游, 老公指定要拣当年望门不敢入的峰景餐厅, 试试它们的星期二自助餐.峰景餐厅居高临下的靓景, 唔驶讲都知正. 当晚虽然因为我加班迟到一个钟, 但餐厅方面知道我地庆祝周年纪念依然留返张近窗的台俾我地, 实在抵赞. 野食方面唔算好多, 但总算齐. 鱼生新鲜肥厚; 生蚝是爱尔兰Irish Rock, 入口爽身, 味道甘甜; 西汤估唔到系我最喜欢的南瓜忌念汤, 很creamy, 前后饮左3碗; 小吃推介鹅肝多士; 热荤方面因为我唔系咁嗜, 完全无掂过, 不过骤眼睇印度咖哩似乎系较为吸引的. 不得不提系甜品部, 不多, 只有6、7款, 但件件都好好味, 是酒店水准. 总括而言, 食品有质素, 非普通货色自助餐, 值得一试.