明閣 (香港康得思酒店)

朋友聚会, 之前试过唔同嘅米之莲餐厅, 好多味道都不似预期, 今次明阁比预期好味, 不负一星美誉。首先上台嘅明阁八小碟同七味金砖豆腐, 味道唔错, 其中烧腩仔皮脆肉嫩, 而豆腐就做到外脆内软, 八小碟嘅份量都几多, 食完已经饱咗一半。一场嚟到, 梗系要试埋个蟹盖, 蟹肉都多, 但味道就不过不失, 个人觉得试一次就够。同行朋友对爵士汤同花胶鸡丝羹都感兴趣, 于是每样都叫咗个, 爵士汤够甜, 鸡丝羹好浓味, 果然系浓汤🤤 另外仲有个清淡嘅菜胆竹笙清炖松茸, 有比较之下, 我都系钟意浓味嘅鸡丝羹😬之后仲叫咗炸子鸡, 羊腩煲, 豆腐煲 同 鹅肝A5和牛炒饭。炸子鸡皮够脆, 肉入味。羊腩煲唔太膻, 肉炆到好淋, 有入口即溶嘅感觉。和牛炒饭炒得够干身, 粒粒分明, 香味扑鼻。反而个豆腐煲无特别, 可以不试。最后叫埋甜品, 为愉快啲聚会划上完美的句号。