立鮨 (安富大廈) (已結業)

近来喺荃湾做嘢，发现呢度都开咗间立食寿司，系立鮨！以前想食立鮨要出到去尖沙咀旺角，而家去荃湾都有得食，实在太好。荃湾呢间店几阔落，好新净。入到去，系电子点餐，非常方便。由于太耐冇食寿司，所以我哋叫晒我哋最钟意食嘅海鲜！首先我哋叫咗葱吞拿鱼蓉军舰，吞拿鱼蓉非常鲜甜，紫菜够脆，成个食起嚟口感非常好。 然之后我哋就食辣味三文鱼军舰，呢个调味好出色，辣味唔会辣得滞，啱啱好有好够香，非常好味嘅调味！近年越嚟越钟意食油甘鱼，黎到梗系要食新鲜嘅油甘鱼啦！呢度嘅油甘鱼仲要加咗啲柚子酱嘅调味，酸酸甜甜更加带出油甘鱼嘅鲜味，好好味。见到呢度都有蟹肉蟹膏军舰，即刻叫咗嚟食。呢度嘅蟹膏份量唔算好多但系味道非常浓郁，呢个份量已经足以令到全个口都系超级香嘅蟹膏味！最重点就系叫咗个日本马粪海胆军舰，因为日本嘅海胆味道真系超级好，绝对唔系其他地方嘅海胆可以比得上。日本马粪海胆入口即溶，海胆非常鲜甜，简直系去咗日本嘅感觉！每一件寿司都系非常好味非常新鲜，超级满足嘅一餐。