混亂拉麵 (已結業)

呢排都非常冻，又系时候食多啲好西储存脂肪保暖，食拉面啱晒，热辣辣既汤面非常保暖，又唔洗谂太多食咩好。混乱拉面位于西九龙中心对面，对于九龙既朋友实在非常就脚，又系鸭记附近，平价美食之选。混乱拉面属于二郎系拉面，用猪骨味噌汤底，非常浓厚既麻甩口味。贪心的人嗌左混乱玉子拉面，加上三倍背脂同蒜蓉，两倍野菜 (因为三倍真系食唔晒)，一上台就见到堆到小山咁既拉面，果然名乎其实既混乱拉面，满满既芝士粉铺面，底下系野菜小山丘，配上叉烧同玉子，大满足汤底系猪骨味噌，加上三倍背脂，一个字，月巴。但系真系忍唔到口，汤底非常Rich 同creamy, 厚既程度好似饮紧忌廉汤咁，有少少浆口，而背脂就系肥膏粒，切到小小既方型，好好咬。而面就选择咗幼面，比较挂汤，可以边食面边吸啜啲汤入口。而野菜就系芽菜同椰菜洋葱咁，师傅系铁板炒过，充满铁板既焦香味。玉子就够晒溏心，不过我钟意再生少少，如果啲蛋汁会流出嚟更好。叉烧就厚薄适中，大大块有两件，满足到食肉兽既胃口。