Baby Elephant Thai Kitchen

营业中

休息中

今日去咗赤柱行街，晏昼就随便喺海边拣咗间餐厅，人流虽然唔少，但系亦都唔需要排队，天气好好，拣咗有阳光嘅位，但系之后有啲后悔，因为冇遮荫。呢间餐厅分开咗两边，一边系泰国菜，一边系西餐，无论你坐边一边，两间舖头嘅Menu都可以拣。 叫咗一个青咖喱猪颈肉配薄饼同一个德国炸猪手配薯条。其中一个配有餐汤，系菠菜汤，我嫌个菠菜味太浓，而且催咗好多次先至送到嚟。至于个青咖喱味道尚可，猪颈肉都有咬口，尚算腍，薄饼微脆，但可能天气冻嘅关系，薄饼好快冻咗。至于个猪手，虽然味道OK，但系炸得太硬，好难咬，另一半啲牙劲啲先比较容易咬得到。炸薯条系扭纹薯条，啱啱炸起，都几脆，但始终天气冻，keep唔到好耐。伙计服务态度其实唔差，但似乎一人多菜单就会乱。 至于环境喺海边加埋好天气真系冇得输，价钱喺赤柱海边餐厅嚟讲，我觉得唔算贵，但当然呢个价钱可以喺出面食得好啲。