夏麵館 (荷里活廣場)

营业中

休息中

以前细个同屋企人去完慈云山探亲人，就会落去荷里活广场食夏面馆，印象中佢哋啲粗炒同小笼包都几好食。到今时今日都已经几年冇去过，咁啱今日路过就入去缅怀一下，结果中咗伏！！！先讲服务态度，我同屋企人12点前已经入左去，店内尚未坐满，店员亦聚集一起聊天，但我哋行到店中间店员先发现我哋，继而询问我哋人数。系咁嘅情况下仲收加一服务费再讲食物，我哋冇叫套餐，散叫一个上海粗炒、一个小笼包、一个酸辣汤（例牌）、一个炒年糕。最先上嚟嘅系酸辣汤，完全唔热剩系得暖，我哋唔介意佢系隔夜嘅(起码冇臭味)，但你都应该完全翻热晒先攞上台挂？煲嘢用块木板垫底攞上嚟，以为好热，结果只手掂个煲净系觉得暖？？？小笼包正正常常，起码佢热过个酸辣汤。最后一个粗炒同炒年糕，卖相望落去还算可以，但真系得个卖相，纯粹老抽落得够，但食落去系唔够味，而且碟底啲汁系水嚟，根本唔算得上系汁。啲年糕几块黐埋一齐，年糕中间根本冇味，直头系白色。环境方面，尚算干净，但系啲枱好窄，偏偏啲碟全部都好大只，唔够位摆。冷气亦未够，饮饮下酸辣汤觉得好热。