板神鉄板燒日本料理 (The Hennessy) (已結業)

好开心老友升职请食饭，之前睇过关于板神嘅介绍，有我最钟意嘅铁板烧，仲有超靓景😍，所以就拣咗去湾仔板神食晚餐。睇下餐牌有套餐，亦可以单点，连寿司剌身都有，但今晚一心一意食铁板烧，一人前套餐有和牛，有龙虾，唔驶谂，直接一人一set啦😋环境好好，今晚被安排坐私隐度高嘅梳化位，有好靓嘅夜景。服务亦非常好，上每碟菜都会详细介绍，好留心我哋有咩需要。讲返食物，本身好钟意食龙虾🦞同和牛，两样都系铁板烧必食之选。呢只龙虾好新鲜，烧得刚好，薄烧和牛亦可以食出厨师功夫，份量真系多，但话咁快俾我食晒。唔好以为只有龙虾同和牛两个重点，原来白鳕鱼先系惊喜，熟嘅程度刚刚好，外皮香脆，鱼肉嫩滑，铺上金薄，好贵气呀！由前菜沙律，到龙虾🦞、白鳕鱼、和牛薄烧都非常满意，再饮埋龙虾头煮嘅面豉汤（味道偏淡）十个满足，炒饭好食但真系食唔晒，相信男士食呢个餐都会好饱🤨一千蚊一位，虽然唔系平，但环境，服务同食物都好高分，我会再嚟，当然有人请就更好啦！希望老友快啲再升职，yeah!!