百樂門煌宴 (已結業)

因今日接到电话知道细佬入左院，所以放工后成家去了医院探佢，探完病后，因弟妇今日搞我细佬入院好攰，想快快回家，但又唔想煮饭。所以搭车去到火炭呢间酒楼快快脆食饭跟著佢赶返屋企瞓觉。其实我对呢间酒楼冇咩好感，因为上次妈咪在呢度摆生日酒时都遇过一个经理好不礼貌，但既然赶时间，就求其去呢度食啦。妈咪打开个餐牌好耐都拣唔到想食乜，后来由我发板求其拣几样𩠌快快食完返屋企便算。第一个系春菜黄豆排骨煲，春菜有点老，但好腍，排骨好大旧，但冇乜肉，个上汤味道都还可以。鱼香茄子煲好香鱼香味，个茄子份量好多。全煲都够惹味，送饭一流！潮式煎蚝饼好大碟，好多蚝响入面，外面脆浆炸得好松脆好香口，入面蚝饼好香好够味！沙巴龙趸蒸得好滑，好新鲜，好快被我们一口气食晒。菠萝咕噜鸡球冇咩特别，酸酸甜甜，不过不失。呢度既白饭用上砵仔蒸，份量啱啱好！饭后有甜品送，可拣红豆沙或蕃薯糖水，我地就拣左蕃薯糖水，食落都几重蕃薯同姜味，只系甜左少少！六个人连茶介加一大约食左六百蚊，在百乐门食饭，呢个价钱差唔多了。