TC2 (Tea Coffee Two)

营业中

休息中

早几年有段日子间中会去太子间 TC2，𠮶度由几个传媒人开，所以成日都有同行帮衬。除咗食嘢，又试过喺𠮶度听音乐会，感觉好 chill。太子店结业之后，TC2 就剩番新蒲岗店。近排经常到呢区工作，终于有机会一试。新蒲岗店同太子店分别好大，呢度装修都几残旧几简陋，应该主要做外卖，堂食全部都系吧台位，坐得唔算舒服。不过一睇 menu，食物饮品平到笑，所以即使冇乜装修，又有咩关系呢😂？我叫咗个套餐，包括鲜果沙律，芝士吞拿鱼三文治同咖啡。先嚟个沙律，好大盒，入面有苹果，雪梨，菠萝同粟米，全部用沙律酱捞匀，超钟意生果嘅我食得好 enjoy。三文治用咗麦包，入面除咗芝士同吞拿鱼之外， 仲有蕃茄同青瓜，所有食材味道正常，唯一系吞拿鱼捞咗沙律酱，味道偏酸，如果用蛋黄酱应该更好。呢个餐最正嘅肯定系杯咖啡，又香浓，口感又幼滑，真心高质👍。成个餐四十蚊有找，好抵食。