麺屋武蔵虎洞 (青衣城) (已結業)

去青衣睇完戏，想食餐饭都咁难……青衣城2期食肆已经迫爆，转战一期都差唔多，最后家人话食拉面就谂起面屋武藏。几年前食过都算唔错，今日食就差咗好多吓喇！面屋主打赤黑白汤底，赤系味噌汤底，白系猪骨汤底，黑系蒜油汤底。我哋一行三人都点咗黑武骨豚角煮拉面，限定松茸叉烧拉面，黑武士沾面，唐扬炸鸡，另追加一份豚角煮。首先系炸鸡，基本上同坊间嘅日式炸鸡一样，不过不失咁啦！系个沙律酱改成 washabi 芥末沙律酱，食起嚟冇咁腻又刺激啲！拉面汤底方面，黑蒜油汤底非常油腻，睇相都饱饱哋，但饮落去出奇清淡冇乜蒜味㖞！赤面汤底就好啲，少油啲，味噌难得啱啱好。而我点嘅松茸汤底就松茸味唔太出，只有浓厚嘅杂菌味。面质方面有粗幼两款，汤面配幼面，沾面配粗面，抵赞嘅系面渌得啱啱好！配菜方面，叉烧每碗有两大块薄片，叉烧经过长时间卤煮，肉质软嫰，味道咸中带甜！豚角煮即炆炖五花腩，脂肪炖煮到入口即溶，钟意食扣肉，东坡肉嘅朋友应该非常喜欢！最后要讲吓服务方面，店面员工得两位，而且系身形娇小嘅美女，但服务勤快，笑容可掬，落单，送餐，添加茶水，执枱可以讲系快而准，今日所有正评都属于佢哋嘅！