三田製麵所 (K11購物藝術館)

营业中

休息中

成日都好想试喺K11呢间三田制面所，今日终于食到。以拉面店嚟讲，呢间算系几大规模，店内空间感十足。晚市都可以选择优惠套餐，有齐拉面、小食同饮品。嚟呢度就系想试佢嘅沾面，款式相当多，最后我就拣咗浓香豚骨鱼介沾面。沾面嘅面条比较粗身，面可以选择冷热，冻嘅面比较爽口，热嘅面就比较腍身。 沾面嘅汤非常浓郁，所以可以牢牢地挂住喺面上面。食晒所有面之后，可以请店员加汤，就变成一碗浓浓嘅汤。另外仲拣咗三田豚骨拉面，佢嘅猪骨汤非常浓郁。汤面嘅面就比沾面嘅面较为幼细，用嚟配汤面就更合适。拉面套餐可以优惠价拣小食，我哋就拣咗煎饺子，入面都几多肉汁。自家制炸鸡嘅肉质就够晒嫩滑，外面炸得香脆而唔油腻，味道不错。加埋罐汽水就系完美嘅一餐。