享慢煮意 (善慶街) (裝修中)

好少踏足上环，嚟到先知道有好多特色嘅食店，卧虎藏龙。其中一间就系法国餐厅：享慢煮意。假日黎到有3-coarse weekends all-day，好丰富。店员好友善咁样同我哋介绍是日餐单。冲著佢嘅牛角包黎所以一定选择佢，系头盘到拣咗龙虾汤流牛角包。一切落去，橙黄色嘅龙虾汤爆晒出黎。龙虾汤咸淡适中，配牛角包有少少似酥皮汤嘅质感，有趣地除咗吸左汤嘅部份，牛角包面头仲系脆。朋友就叫咗另外一个甜点嘅牛角包，海盐焦糖咖啡。佢都系流心系列，流心部分质感比较偏向mousse，味道似mocha，作为甜品都系好选择。主菜叫咗牛腹扒，虽然唔系全件上，但分开咗几大嚿配上南瓜蓉，卖相更吸睛，明显有花心思。中间仲有好靓嘅粉红色，熟度啱啱好，外表煎得脆，内里仲保持到好嫩滑。面头有椰菜丝、提子，为呢个以肉食主菜加添refreshing感觉。最后当然唔少得甜品！嚟到呢一间法国餐厅，就点左真空慢煮焦糖炖蛋。对于佢点样真空、点样慢煮，其实我都唔知，只系知道好味。面头脆脆嘅焦糖配上好浓滑嘅炖蛋，最底层仲有蓝莓酱，令到呢一个焦糖炖蛋层次丰富。温馨提示：好彩订咗位，食到一点几嘅时候已经好多人等。