海膽仔

营业中

休息中

好耐冇食日本嘢，今日专程同朋友过嚟食个便饭，呢间海胆仔有多款熟食或刺身定食可选，价钱由$58起，不过我哋就梗系拣刺身啦！每个定食都会附送沙律同埋汤，当我以为系面豉汤嘅时候打开竟然系蚬肉汤，出乎意料之外，都几鲜甜，豆腐又够滑，仲有少少海藻，唔错唔错。至于沙律就冇咩特别，都系沙律菜、蕃茄加上醋汁等等，都开胃嘅。刺身定食($118 ），有三文鱼、煮王（我都唔系好识呢只鱼，系师傅教我的，唔知系咪咁写呢！😝）、赤虾、北寄贝和带子，款式来讲都算几多，食材新鲜，而且碗饭仲好大碗！除此以外，间铺叫得海胆仔，我梗系要试吓佢嘅海胆，佢有两个定食都有海胆，最后我哋拣咗「爆胆丼」（ $168 ），果然劲多海胆！仲有鱼子添！海胆有两款，有块版垫住嘅系加拿大海胆，另外直接放喺块面上面嘅系加州海胆，两者颜色上有少许分别，前者颜色较深，不过两种都好鲜甜肥美新鲜，食得出加拿大海胆质地相对爽口啲。呢个价钱食到呢个份量和质素，好满足呀！而且佢仲有得买外卖，如果唔得闲坐低食，买返屋企都好好呀。