蜀府川鍋 (已結業)

鲤鱼门出名海鲜，呢间近水楼台嘅蜀府川锅都主打海鲜，质素真系几好！而且价钱真系好宜人，啱晒我哋！唔讲几钱住，先讲个「蒸气塔」有咩先！鲍鱼啦、龙虾啦、龙趸啦，仲有元贝、大蚬，净系睇呢个派头都唔少嘢啦！再加埋蒸鸡、粥底，真系几满足架！咁多嘢一个人都系168蚊，真系几吸引！仲要质素真系唔错，只龙虾非常鲜甜，好新鲜！而且厨房好细心，一早已经爆咗只钳俾你，除咗虾身大块肉易食之外，只钳用少少力一搣就开，原只食啖啖肉，正！至于另一个主角鲍鱼，未煮前真系生猛到一个点，仲郁来郁去！所以你可以幻想到啲肉有几清爽同清甜！不过都要提提呢度啲调味，元贝同龙虾上枱时都有落少少蒜喺上面，俾你一齐蒸嘅。个份量都几适中，唔会抢咗海鲜嘅原味，但又可以点缀一下，厨房系劲嘅。但系食完呢个塔撩起咗，有少少唔够喉！所以再叫多个炒蚬，一样好高汁！啲蚬无沙又大只，啲肉好厚！而且调味都刚刚好，唔似有啲小炒铺咁，似食炒豉椒多过炒蚬！份量就中规中矩啦，都有成20几30只架！下次如果去鲤鱼门，唔驶落到底去揾食嘅，呢间近近哋地铁站都好值得去下！