京滬村 (已結業)

今晚带 daddy 嚟试吓喺元朗嚟讲唔系好多餐厅有得食嘅片皮鸭。韭黄炒鳝糊，上海菜嘅浓油赤酱，加埋拣手以及为数不少嘅鳝碌，经过爆炒之后香气扑鼻，份外惹味，加埋碗白饭，无敌。四川担担面，呢间餐厅嘅担担面有好香浓既花生味，啱哂钟意食花生嘅爹哋，连平时食面唔会饮埋啲汤嘅佢都几乎将成碗汤清哂，面质方面爽口弹牙，特别钟意佢面头𠮶啲肉碎无乜肥膏，咁就可以留返啲胆固醇俾一阵个片皮鸭啦。千呼万唤嘅片皮鸭终于登场，侍应姐姐将原只片皮鸭推到我哋面前，再喺我哋面前逐块逐块咁样片层皮出嚟，首先俾咗四块我哋，佢话呢四块特别肥美要点糖嚟食，果然别有一番风味，剩低嘅一大碟就用传统嘅方法嚟食，先将片皮鸭点满片皮鸭酱，再夹多两条京葱同埋青瓜，用块皮包住嚟食，鸭嘅油脂，京葱同埋块皮相互配合，好好味啊。高力豆沙，临尾以呢个咁美妙嘅甜品作结实属最好不过，高力豆沙口感软熟，蛋味香浓，加埋入面只有少少甜嘅豆沙馅，满足嘅一餐就咁完满结束。