利寶閣 (已結業)

今日做个乖孩子约妈妈出去饮茶，当然要拣地点方便，食物质素好嘅地方，搜寻下呢到做紧$148/位嘅午市放题（茶水加一另计），约定妈妈去叹下先。星期日系上环区估唔到都咁多人嚟饮茶，但好在酒楼够大，位又多，好快就安排到入座。放题任食2小时，款式大概超过50款即叫即做点心、小食、粉面饭及甜品任点任食，另外每位更送原只鲍鱼酥及一份花胶灌汤饺，非常足料。点心选择与平时饮茶无异，而且仲有好多特式嘅点心及小食提供。以下系个人推介——————猪脚姜，味道甜甜唔会酸，猪脚好入味，蛋亦唔硬，真系好味又养颜；怀旧芝麻卷因好少地方仲有得食，可以怀缅一下，食落好香芝麻味，而且唔太甜；萝卜金钱肚金钱肚炆得入味而且软腍；仲有必食嘅晶莹鲜虾饺及百花烧卖王，完全大满足。呢到放题点餐形式不错，可依照件数或位数去点餐，大大提高珍惜食物不浪费嘅情况。唯一需要改善之处可以话系上菜速度，可能即叫即做嘅关系，所以会比较慢，但始终系限时，所以如果能够有些少改善会好些少，不过整体而言是一个不错而且物有所值嘅选择。