羅麥記 (已結業)

呢间罗麦记同家下已经泛滥嘅冰室一样，主打怀旧，但睇得出佢都花过下心思喺装修，有6-70年代feel，不过最紧要都系食物质素！招牌罗麦汁牛河，即系瑞士汁牛河。我嗌咗多汁，但上菜𠮶时好明显见到啲河粉系干嘅，于是叫佢另上兜汁，好彩个汁都算有味，正常瑞士汁，所以炒河味道系合格，同埋唔系用幼身河粉，食落都有咬口。但系炒得略嫌唔够火候，松肉粉牛肉牛味欠奉，不过未至于系浮尸十日嘅牛。窝蛋鸡肉焗饭就麻麻地，普通白汁得个咸，个饭炒底但湿笠笠咁，鸡件系滑嘅，但冇乜调味，只蛋嚟到𠮶时已经穿咗，卖相一般。茶走还好，虽然都系有落到花奶，但炼奶嘅甜度适中，奶味都冇抢哂茶味，有返茶餐厅应有水平。考虑埋价钱，佢又冇收加一，相对其他铜锣湾茶餐厅物价嚟讲唔算贵，整体嚟讲，嗌中佢嘅拿手菜，都食得下嘅。