吉豚屋吉列豬扒專門店

营业中

休息中

平时好少食炸物，偶然谂起尼间餐厅门外成日有人排队，一于晚市早到食。星期六晚市6点半左右到，好彩唔驶排队等位。叫左吉列猪扒黄金豚肉饼定食($77)，吉列鸡扒定食($52)。定食会跟白饭、野菜豚肉汤(小)。食物好快就送上黎，炸物脆口，热辣辣。底部既菜丝多，有芝麻酱可以伴黎食。猪扒厚身，炸粉唔算厚。而炸粉应该有混合木糠，食落好脆口，会一口接一口。加埋猪扒酱一齐食，感觉好似冇咁邪恶，同埋口感会清爽左。而肉饼味道几特别，虽然一块大约拳头大小，但够厚，而咬落去仲有肉汁。加$5可以将白饭及野菜豚肉汤改做赞岐乌冬，乌冬软硬适中，汤底味道正常，饮完唔会口干。份量都足，男仔食哂个set，够哂饱。鸡扒厚肉juicy，就算放耐左先食，都依然脆。不过白饭就较为逊色，有d冻，如果热d会觉得好食d。虽然系小碗，但汤料有好多，满满既豚肉、蔬菜，汤底清甜。整体，大约7点开始人多要排队等位，食到中途侍应突然走过黎讲，话用餐时间得50分钟，好突然。如果系入座既时候讲声，感觉会好d。或者可能有张贴，但冇留意。胜在炸物唔错，价钱比同区餐厅更亲民。